أمى حاولت قتل أولاودى عشان تورثنى

المشكلة اللى جاءت لنا  فى حال الناس وهى لسيدة امها تفعل معها ما لايطاق تعرفوا على السبب لأنها مشكلة صعبة جدا تعالوا نشوف الرسالة اللى بعتتها من خلال أسمع كلام ستك.

انا قررت احكي مشكلتي هي كبيرة استحملوني وانصحوني انا ممكن اكون ضحية وممكن اكون غبية مش عارفة انا مين  فيهم.

مريضة بالقلب وأمى تعايرنى بذلك 

اولا انا مولودة بعيب بالقلب من صغري امي كانت معاملتها غريبة معايا جدا محستش بحبها او حنانها وكان نفسي ولو مرة انام على صدرها وابكي او تضمني ، في المقابل كانت شداني ليها بصورة غريبة بالرغم الجفاء دة بس كنت مقدرش اتخيل نفسي من غيرها وكانت ديما بتصورلي ابويا انه شيطان وبيكرهني وديما تقولة انت بتكرها لية وتيجي تقولي هو بيكرهك ابعدي عنه مش عايزك تنجحي وديما مفهماني انى المفروض انجح علشان اتحداه واغيظة وطبعا كنت انا وابويا بنكرة بعض!!

اي غلطة مني لو صغيرة تقاطعني بالاسابيع يعني مثلا لو رجعت من شغلها لقتني مغسلتش المواعين او منظفتش يبقي قطيعة بالاسابيع افتكر في مرة اني نفسيتي تعبت وبقيت نايمة اقسم بالله بعوي زي الكلبة وبعدها بيومين قلبها حن وكلمتني.

اتخرجت من الجامعة نفس كلية بابا واشتغلت في نفس مهنته بس بعيد عنه لانها مفهماني انه كارهني وهيضيع مستقبلي وكمان اعمامي اقل مني علما وبيغيروا مني وبيكرهوني وفجاه بابا تعب ومات

انا اتحملت المسؤلية ومسئولية اخواتي واجراءات الميراث كلها اتبهدلت بمعني الكلمة في الوقت دة كنت ديما حاسة اني وحيدة ومنعزلة حتي عنها وهي مش بتحاول تقرب مني.

اتقدم لي شخص يوم ما اتكلم معاها هي كانت بتكلمة بصورة سيئة وتخلية ياخد عني فكرة وحشة بس سبحان الله هو كان متمسك اوى بية لدرجة انها قالت له متدخلش البيت لو عايز تتجوزها علشان اخوها وعمامها هيعملوا اعمال ومش هتتجوزوا معرفش اية اللي خلاه يوافق ووصل بينا الحال اننا بنجهز علشان نهرب من وضع غريب ومريب لما يرسل كتالوجات الفرش تصوت وصل انى كنت بقيس فستان الخطوبة راحت مصوتة وخرجت معيطة في الشارع نشتري الشبكة سابت المحل وسابتني ومشيت .

حاولت تطفيش زوجى وقتل أولادى 

لقيت جوزي بيقولى احنا خلصنا شراء كل حاجة هو كان اعطاني مبلغ علشان انا اللي اشتري الموبيليا بس يومها كانت اختي معايا وشاهدة انه اداني الفلوس وراحت قالت لامي ان الفلوس دي فلوسي انا وانكرت انها فلوسة وحصلت مشاكل كتير مع خطيبي وخالي وحلفنا على المصحف انا وخطيبي انها فلوسة مش فلوسي وبعدها جة خطيبي قال ملهاش لزمة خطوبة احنا هنتجوز كان الكلام يوم الثلاثاء والخطوبة الجمعة والمفروض انه هيسافر شهرين ويرجع نتجوز فجهزنا كل شيءوكلم خالى والح علية وافق اتجوزت الجمعة اللي هي اصلا كانت المفروض خطوبة من غير فستان ولا فرح لبست فستان الخطوبة بس مش مهم المهم ان ربنا عوضني معاه بحنان وامان واولاد.

دخلت في شقتي مكنتش مفروشة بس مش مهم فرشناها تاني يوم مع بعض

تاني يوم في الصباحية لقيتها بتتصل بية تقولى انا عايزاكى  تتنازلى عن ميراثك اتصدمت بدل ما تباركلي تقولي ميراث المهم متكلمتش ولا كلمة وقفلت وبعدها باسبوع قالتلي اختك خطوبتها الجمعة الجاية وقفلت

رحت لها بس شفت منها جميع انواع العذاب حبستني وخدت تليفوني وصل الامر قطعت عني النور يومها انهارت وفقدت النطق ورجعت بيت جوزي منهارة تماما بس سمعت منها كلمة واحدة مشقادرة انساها من دماغى  انتي مولودة مريضة لو موتى جوزك هيورثك اتنازلي.

قلت لها هو احق واحد يورثني لانه هدية من ربنا احن علية منك انا مشفتش النوم والامان غير معاه بعدها عرفت ان خطوبة اختي اتفسخت واختي قالت ان انا وجوزي رحنا له الشغل وسؤنا سمعتة وسبحان الله وقتها كنت في المستشفي لاني لازم اعمل حقن مجهري بس هي صدقتها وبالرغم من كل دة وقف جنبي وعملي العملية وربنا كرمني بولد عندة الان ست سنين وفوجئت بعد شهرين اني حامل من غير علاج ولا عمليات وكرمنا ربنا ببنت.

زوجى وقف بجوارى فى أزمتى 

هي لما عرفت خلت ناس تتصل بزوجي تسؤ سمعتي وجت بيتي عملت مشاكل مع اهل جوزي وراحت شغلي عملت مشاكل واتوقفت واتحقق معايا كل دة علشان اتنازل لان دلوقتي اصبح عندي اولاد هيورثوني ،اخر حاجة هددت بقتل اولادي وعشنا يوم رعب لما حاولت تنفذ تهديدها والشرطة اتدخلت.

انا متجوزة من عشر سنين محاولتش يوم تسال علية ولا حاولت تشوفني بقالها خمس سنين مشفناش بعض كل اللي اعرفة عنها انها بتغيظ فية هي واختي ورسائل تحرق الدم ، بجد نفسيتي تحت الصفر مش قادرة استوعب ازاي امي تعمل كدة فيا.

حل ستو :فى البداية الله يكون فى عونك ويهدى الحال فما كتبتية صعب للغاية فكل ماعليكى فعلة ان تلتزمى بمنزلك وتدعى بالهداية لأمك فهى فى النهاية امك فأكثرى من الدعاء كما يجب عليكى أن تشوفى أقرب شخصية لامك وتؤثر عليها حتى يتم المصالحة خاصة أنها فى النهاية امك ويجب ان تبعدى أبنائك عن هذة المشاكل حتى لايكرهونها مثلما حدث معكى مع والدك .