نصائح مهمة للبنات قبل صلاة العيد ..أزاى توقعى عريس

الموضوع دا مش سهل طبع كلنا عارفين ظاهرة العنوسة ودا اللى بيخلى صلاة العيد نقطة انطلاق للبنات عشان تصطاد عريس لقطة .

خطوات أصطياد العريس فى صلاة العيد

القصة بسيطة زى ما وصفتها ستو من خلال أسمع كلام ستك طبعا بتبدا من الملابس لازم تتشيكى او حتى تلبسى اسدال يحبذ ان يكون غامق لو لونك فاتح والعكس طبعا لو بشرتك غامقة واول ما تدخلى للصلاة تصطادى واحدة ست كبيرة وتقعدى جنبها.

وتقوليها ممكن اقعد جنبك ياتنت وتبدأى فى الكلام معلش اصلى بقالى يومين منمتش هتقولك لية قوليلة كنت بروق مع أمى ومسحت الشقة وفرشت .

هتبدأ تلتفت ليكى وتسمع حلو اوى وبعدين تقوليلها أول ما امشى هروح عشان مجهزة الفتة والرز طبعا هتفرح بيكى لانك كدا بينتى انك شاطرة فى النتظيف وعمل الاكلات ويا سلام لو زودتى بقى وقلتلها انك بتعرفى تعملى ممبار وكوارع اول ما تقوليلها كدا هتفرح بيكى على طول .

الخطوات السحرية لتكملة باقى التمثيلية

وطبعا يكون الشيخ خلص وهتصلوا وبعدها تعرضى عليها توصليها وتصرى على كدا وطبعا وانتى ماشية هتلاقى ناس بتدبح تسخسخى على طول ويا سلام لو وقعتى هتحس انك مرهفة ورقيقة وقلبك طيب يا سلام وطبعا هتخد تليفونك وتظبط معاكى عشان تخطبك لابنها وحظك يبقى نحس طبعا لو طلع اولادها متجوزين ساعتها اخبطى راسك فى الحيط.

وطبعا كدا ممكن تبوظ القصة وتضطرى تستنى لحد رمضان الجاى عشان يمكن تعرفى تصطادية فى صلاة التراويح .

طبعا كل اللى فات ده على سبيل السخرية من اللى بيحصل من البنات وعمايلهم فى صلاة العيد لان الغالبية بتروح عشان تصطاد عريس ومن الاشياء الغريبة ان البنات تلاقيهم كل واحدة حاطه على وشها كيلو مكياج وتبقى عاملة زى عروسة المولد وتلاقيها فاكرة انها بكدا هتلفت الانظار .

وفى النهاية بقى ياترى بكدا تقدر تصطاد عريس البعض بينجح والكثيرون بيفشلوا ولكن تبقى فى النهاية الاخلاق فهى الاساس والبنت المؤدبة والكويسة هى اللى لازم تكون مقتنعة ان نصيبها هيجلها لحد عندها مش هيقف على حد وتعالوا بقى عشان تشوفوا راى ستو فى الفيديو.