خطيبى يرفض كتابة الذهب بالكامل فى القايمة وأمى مصرة

الرسالة جاءت من أحدى صديقات أسمع كلام ستك وهننشرها فى حال الناس وهى ببساطة مخطوبة منذ 8 شهور وعنما جاوء لكتابة قائمة المنقولات كان الخلاف حيث تصر أمها على كتابة ذهب بـ50 ألف جنية وهو يرفض وغرض والدتها تأمين أبنتها حيث أن والدها متوفى تعالوا نشوف الرسالة زى ما بعتتها صاحبتها لو سمحتوا انا مخطوبة بقالي 8 شهور خطيبي واهلي فى  قعدة الأتفاق  اتفقوا انه هيجيب شبكة بـ 20 الف وجاب ب 20 فعلا والدهب واحنا بنوزن زاد جزء احنا اللي دفعناه عشان احنا احترمنا اتفاقنا معاه ودلوقتي الجواز قرب فماما بتتكلم معاه فى القايمة وكده فقالتله انها عاوزه تكتب شبكه 50 الف فى القايمة فهو مرضيش وزعل ومعاملته معايا اتغيرت من ساعة ما ماما قالتله كده.

خطيبى وأمى فى عناد بسبب القائمة 

انا لو عليا انا والله ما عاوزه حاجة وقولتله كده قولتله اني لا عاوزه عزال ولا كوافير ولا فرح ولا اي حاجه والله ولا حتي كمان الدهب اللي هو جابه وأنه لو عاوزه يخده عادي وبتكلم جد والله مش بعزم عليه وهو عارف كده بس يريح ماما لأن هي تعبانه وانا ماليش غيرها بعد بابا الله يرحمه ربنا يعلم هي بتحبه ازاي وأنها بتعامله زي ابنها وأنها ما طلبتش منه حاجه قبل كده.

هددنى أنة يتركنى لو متحلتش المشكلة 

و ده اول طلب ليها وانا كل ما اساله اقوله ليه رافض يقولي انا لو وافقت وقولت حاضر انا كده مش هبقي راجل،مع العلم برضو اني عمري ما طلبت منه حاجه او قولتله عاوزه حاجه بالعكس دايما ببقي مقدره ظروفه، المهم امبارح كنا بنتكلم ف الموضوع جه فى الكلام فقولتله سيبها لله ساعتها ربنا يحلها فقالي لا عرفيني اية الوضع عشان اعرف أتعامل.

فسألته وقولتله طب افرض اصرت على رأيها قالي هصر انا كمان على رأيي، قولتله يعني هتسيبني قالي اه هسيبك الكلمه دي زعلتني أوي، ومش عارفه اعمل اية معاهم الاتنين مع العلم اني أمي بتقولي خرجي نفسك انتي من الموضوع واتعاملي معاملة  طبيعي انا بس عاوزه اعرف هو غلطان ولا لا مع العلم انه من بعد ماقالي اه هسيبك دي مكلمنيش ولا بعت حتي رسالة.

حل ستو القصة بسيطة وسهلة مامتك هدفها تأمينك وخطيبك هو كمان بيعند لأنه حسبتة اذا وافق على ذلك يبقى هيوافق على حاجات تانية أو اى حاجة تقولها والدتك والله اعلم بما يتم برضو عشان منظلموش أنما هو مخطئ فى كلمة هيسيبك ويمكن بس هى لحظة غضب ومتكلمهوش الا لما يكلمك لان الكلمة الطيبة صدقة ثم الحل ببساطة يتكتب اللى موجود بالفعل سواء اللى جابهولك أو اللى موجود معاكى فتلك هى العادات التى تربينا عليها ويجب على والدتك أن تتحلى بالمرونة بعض الشئ وربنا يسعدكم ان شاء الله.