جوزى عايز يقعد فى شقة والدتى

حال الناس وصلها شكوى من احدى اعضاء صفحة اسمع كلام ستك.. القصة أنها متزوجة من عراقى ويعاملها معاملة سيئة ويرفض أنه يجبلها شقة وعايز يقعد باستمرار فى شقة والدتها ولايطاق فى عيشتة ويرفض الصرف على ابنته وتعالوا نشوف المشكلة زى ماجتلنا .

جواز 5 سنوات والنهاية صعبة 

بصي انا متجوزه من خمس سنين من ابن عمتي بس هو مش مصري باباة عراقي وهو مقيم في دوله أوروبية المهم انا متجوزتوش عن حب اتجوزتوا لان اهلي كانوا ظروفهم بسيطة وعلي قدهم المهم انا لما جيت اتجوز قولت لبابا انا عايزه شقة ويفرشهالي زي اي عروسة هما العادات عندهم.غير مصر في مصر زي ما انتي عارفه العروسة بتجيب والعريس بيجيب مرضيش يجبلي شقة وأمه اللي هي عمتي لما باباطلب منها أنه ابنها يجبلي شقة قالت لبابا هي بيعه وشروه وصممت ابنها ميجبش مع العلم ابنها اللي هو زوجي مقتدر.

انا طبعا كنت لسه صغيره في السن وقولت لبابا انا مش عايزاه اديله شبكته بابامرضيش وقعد يقنعني ووافقت اتجوز ه واتجوزنا في شقة ايجار مفروش وسافر  بعد اسبوع ومش قادره اقولك اتفجأت في الاسبوع دا بطبعه عامل ازاي كان يصحي من النوم يشتم ويسب ويزعق ويكسر الأطباق في الارض المهم كنت بقعد اعيط وقولت لبابا هو أنكر وقال لبابا انا كنت متعصب المهم سافر وانا عملت ورق الفيزا وسافرت بعده بشهر وقعدت تلت شهور وراني المر هو بيجيب كل حاجه بس طبعة غريب مش سوي نفسيا كل يوم سب ولعن ويقولي من أردء الألفاظ والشتائم المهم انا كنت بسكت لاننا في غربه ومفيش حد جنبي ولما كنت بروح عند مامته  واشتكيلها كانت تقولي معلش اي راجل بيتعصب كدا.

اقول يا بت خلاص عدي وعيشي المهم يا ستي مش هطول عليكي حملت منه وجبت منه بنت وهي دلوقتي دنيتي كلها هي اللي معوضاني عن الأسي اللي شوفته وبشوفه وانا حامل فيها عملي ورق وانا عنده اسمه لم شمل الأسرة عشان اخد اقامه واقعد معاه علي طول المهم الورق اترفض ونزلت مصر قعدت شهرين.

وفاة والدى صعبت الأمور وزوجى يعامنى معاملة سيئة 

وبابا مات قبل ما اولد بعشرين يوم وولدت وجيت اقدم علي فيزا اترفضت بسبب اني كسرت فيزا لما هو قعدني وعملي جمع الشمل قعدت سنه ونص مع ماما وهو بقي يبعتلي مصروف وانا اللي بقيت شايله بيت ماما لان بابا مسبلناش حاجة وهو بقي لما ينزل مصر عايز يقعد عندنا في الشقة وشقة ماما صغيره وانا ليا اختي مطلقة وقاعده ومعاها طفلين يجي هو بقي كذا مرا قعدنا عندنا يقعد يشتم ماما ويقول لأختي يلا اطلعي برا انتي وأولادك في الشارع انا اللي بصرف عليكوا وشتائم بأقذر الألفاظ بس انا مش بسكتله وبرد عليه المهم هو دلوقتي بقاله سنتين بيقعد يقدملي علي لم شمل ويرفضوا ويقولوه الأسباب اني خطر علي أوربا وكلام فاضي ويرفضو عشان احنا قرايب.

المهم انا بقالي سنتين قعدا مع امي وهو بيبعت مصروف قليل وكل شويه عايز ينزل مصر ويقعد عندنا انا قولتله متجيش عندنا عايزيي هاتلي شقه هو سمع كدا ونزل فيا شتايم  وخلاص عيزة اتطلق .

حل ستو : طبعا تم التواصل مع الصديقة وتم الاتصال بالاستاذة يارا المحامية وأحدى الداعمات لصفحة أسمع كلام ستك وسيتم حل المشكلة خاصة ان هناك بند فى العقد يسمح بذلك لأنة من جنسية أخرى وحفاظا على حقوقك وحقوق بنتك .