جوزى عايز يرجعنى انا وأبنى وخايفة على أهانتى

حال الناس النهاردة وصلها مشكلة وهى ببساطة زوجة غضبانة ولديها أبن وزوجها يحاول لعودتها مرة أخرى وهى خايفة بسبب انه ضربها قبل كدا وحاجات تانية كتير .

زواجى فاشل من الشهور الأولى 

انا من الشهور الاولي للجواز وانا في مشاكل مع جوزي اساسها احساس جوايا انه محدش بيعمله حساب خاصة بعد ما شوفت اخواته البنات بيشخطو فيه وبيهينوه كأنه طفل صغير وانا اصلا شخصيتي غير كده ومعروف عني اني شخصيه قويه وبردو الناس كلها بتعملي حساب وعلاقاتي بالناس حلوه.
المهم يعني كان جوايا نفور ليه فظيع دايما حزينه وقاعده لوحدي من اول اسبوع جواز عمرنا ما قعدنا مع بعض نتفرج علي فيلم مثلا عمري ما قعدت معاه غير وقت الاكل ودايما قاعده لوحدي هو ملوش تجارب وطيب جدا ومسالم ملوش في المشاكل ولا له انياب اتكلمت معاه فشلت في تحقيق اي نتايج.

ومع الحمل والتعب وانعدام تحمله لمسؤوليتي كترت المشاكل بقي يمد ايده ويشتم ويهدد ويعايرني بفشل خطوبتي السابقه فيما يبدو كأنه مشهد كوميدي كأن حد محفظه اللي يقوله ويعمله عشان يثبت ليا انه شخصيه ورجوله وهو اصلا شخص مش بتاع الكلام دا ومش طيبته وهدوءه اللي كان مكرهني فيه دي كانت الحسنه الوحيده فيه.

اسباب خلافتنا ضعف شخصيتة أمام شقيقاتة

وانا طبعا باخد موقف عنيف ضد تصرفاته بغض النظر عن رأيي فيها  المهم الموقف اتصعد و انفصلنا بدون طلاق رسمي وفات دلوقتي حوالي سنه بعاد عن بعض حاول الصلح كتير بعد ما اهلي وقفو في صفي ولما بيجي يشوف ابنه عندنا بيجي في وقت شغلي مبنتقابلش
وسط بينا ناس كتير رفضت وصممت على  الطلاق خصوصا ان الحركه دي بتستفزني لما الاقي اشخاص غريبة معرفهمش جايه تناقشني في اسبابي .

علي فكره عمره ما جه معايا عند دكتور وانا حامل كان بيديني 600 جنيه طول الشهر رغم انه عارف ان عيشة اهلي كويسه انا مش واخده اعيش مضغوطه بقيت بصرف انا وعايشه طول الشهر عند اهلي وهو يجي يومين في الاسبوع لانه مهندس وشغال بعيد اقعدهم معاه اقضيهم خدمه ووحده وبعدين ارجع لاهلي تاني.
انا تقريبا متكفله بمصاريفي انا وابني وهو كل فين وفين يبعت 400 او 500 رغم اني ابنى رضاعتة مش  طبيعي واللبن الصناعي غالي وبصرف في حدود 2000 ل 3000 وانا مش عارفه هو قلة اصل اني مبتحملش ظروفه واصلا كل الناس بتبدأ كده ولا هو من الاول اللي دخل بيوت الناس وهو غير قادر علي فتح بيت ولا دا بخل ولا استخسار لانه عارف انه انا هصرف كده كده.
المهم دلوقتي بعد فترة بُعد طويله  وحشني احساس ان ليا مكان خاص بيا خصوصا عفشي وشقتي بيهرس فيها وسكنها العنكبوت وهي لسه بشوكها وصعبان عليا ابني ميتمتعش بفرشه وغرفتة الجميلة.
مفيش جوايا شوق للشخص رغم ان اتجوزنا صالونات وخطوبة قصيره لكن كان جوايا شوية مشاعر مبقوش موجودين دلوقتي بيحاول يرجعني واعتذر ليا كتير واعتذر لاهلي عن اهاناته وعدم تحمله المسؤوليه.
وناس بتقولي اعملي محاوله عشان ابنك وانتم اصلا ملحقتوش تعيشو مع بعض مع العلم اهله محدش حاول يتواصل معانا نهائي وبعد كام شهر باباه جالي لانه كان في مشوار قريب مش جاي مخصوص يعني كأني واخده واحد من ملجأ .

خوفى من العودة لأسباب كثيرة

هما ظروفهم المادية اقل مننا  بفرق واضح وعارفه انه عليه ديون من الجواز فساعات بستحرم اخد منه القايمه وهو لسه بيسدد فيها وساعات بحس انه مش راضي يطلق بس عشان ميخسرش.
انا بفكر اجرب  ارجع من منطلق انها خربانه خربانه يمكن الاقي الوضع افضل من توقعاتي مع ان من جوايا عارفه اني مش بتاعة ضل راجل ولا ضل حيطه وانه مش هيتغير وامي محتاجه راجل كما يجب وكمان عشان مجرد ذكر اني منفصله بشوف الطمع والاسترخاص في عيون الرجاله الناقصه وانا خايفه علي نفسي وبردو خايفه ادخل في دوامة المشاكل والاهانات تاني وقعدات العيله والاهانات المتبادله وعرفوني اعمل ايه ولو رجعت اتصرف ازاي اخلي حياتي طبيعيه ازاي ابدأ بإيه لان ما بينا جبال جليد.

حل ستو:من الواضح ان زوجك طيب جدا وهذة هى ظروفة المالية ونصيحتى لك ان تعودى وتقومى بتربية ابنك مع والدة فى جو أسرى وقفى بجانب زوجك فمن الواضح من كلامك انه يحبك والا ما كان اعتذر  وهو فى ازمة بدليل انه مازال يسدد دين الزواج .