خطيبى بقالة سنتين مجبليش هدية

حال الناس هو اللى بيتكلم بالشكاوى اللى بتوصلنا من صديقات صفحة أسمع كلام ستك ومشكلة النهاردة فتاة خطيبها فى الغربة وبيجيب هدايا لكل أسرتة ومفتكرهاش بأى هدايا من سنتين وهى زعلانة دى طبيعة المشكلة اللى جاتلنا وهننقلها زى ما صاحبتها ارسلتها لينا وستو هتقولها على الحل .

خطيبى بيحضر لأهلة كل الهدايا ومبيجبليش 

انا خطيبى مسافر من سنتين ومن ساعة ما سافر مبعتليش اى حاجة وهو دايما  بيقولى ابعتلك حاجة قوليلى عاوزة ايه بس انا طبعا  بقوله مش عاوزة حاجة والله وربنا يعينك وبعدين انت عندك مسؤليه وجهاز وكدة اقسم بالله  انا مقدراه جدا بس هو بيبعت لاهله على طول ملابس  وفلوس وكل حاجة وانا بفرح بكدة والله وبشجعه كمان  وانا الى بقوله هاتلهم وكدة ومتقصرش بس بصراحة النهاردة حصل منه موقف ضايقنى وزعلت جدا  اوى.

والقصة أن  اخوه معاه فى الغربة ونازل الاسبوع اللى جاى هيجى البلد اجازة يعنى المهم خطيبى كلمنى قالى انا نازل السوق اشترى حجات قالى اشتريت ملابس  وشيكولاتة وحجات لامى واخواتى وابويا وولاد اخواتى كلهم وبكرة هنزل اشترى عبايات وحجات تانية لامى بصراحة مش هكدب انا زعلت لانه فكر فيهم كلهم وانا لا حتى لو هدية بسيطة.

اقسم بالله بس انا مش باصة لحاجة بس عشان متفتكروش انى ببص لأهله بس الحكاية تقدير والله انه فكر وجابلهم وخطيبته مفكرش حتى يسألها عاوزة حاجة اجبهالك انا والله عينى مليانة بس الموقف ضايقنى والله بس مبينتلوش حاجة قولولى ده ايه معقولة يكون بيستخسر فيا وبخيل معايا ولاتسموه ايه ده ياريت والنبى وبلاش غلط فيا والله بس نفسي اعرف ايه ده وليه كدة.

حل ستو وهدايا فترة الخطوبة 

حل ستو القصة ببساطة متزعليش بعض الشباب مبيبقاش واخد بالة وكان ممكن تحليها ببساطة وتهريج وهو بيقولك كدا تلفتى نظرة بطريقة بسيطة وظريفة وهو بيقولك دا كله كنتى تقوليلة وطبعا عاملى مفاجاة فى هديتى طب مش هتقولى اية هى من ناحية تعرفى اذا كان بخل منه ولا لأ ومن ناحية تانية لو مش واخد باله يبقى لفتتى نظرة وعرف خاصة أن بقاله سنتين مجبش أى هدية ولا فى أى مناسبة والمفترض أمه أو شقيقاته كانوا لفتوا نظرة لأنهم بالتأكيد بيسألوة وكانوا فهموه أن أبسط شئ هدية حتى لو بسيطة سواء فى عيد ميلادك أو فى نفس توقيت خطوبتكم أو عيداو خلافة من المناسبات المتعارف عليها ومتزعليش نفسك خالص وساعتها هيبان كل شئ