حماتى شالتنى وانا والدة وأمى سابتنى من اول يوم

مشكلة جديدة جاتلنا من عضوة فى الصفحة هنعرضها زى ماهى

مشاكل مابعد الولادة 

أنا لسه والده من يومين قيصرية وطبعا كانت معايا أمي وحماتي وجوزي وأهله في المستشفى أمي بمجرد وصولي البيت سابتني في الشارع عشان تمشي أهل جوزي قالولها اطلعي طلعي بنتك واطمني عليها الأول وبعدين روحي هي رفضت ومشيت طبعا كلهم اتضايقوا من اللي أمي عملته حماتي طلعتني هي وجوزي واكلتني واطمنت عليا وبعدين نزلت تاني يوم أمي جت الساعه 10 الصبح عملتلي فرخه وقعدت شوية الساعه 12 الضهر كانت ماشيه وتقولي اصلي مفيش حاجه اعملها يبقى اروح.

وسابتني ومشيت وكان فيه حله فيها حبه رز ريحتهم مش حلوه فضتها ووقفت أنا اغسلها بنتي نزلت عند حماتي بتسالها عليا قالتلها ماما بتغسل المواعين طبعا هما اتضايقوا جدا وحماتي اتصلت بيا هي وحمايا وزعقولي ازاي يبقى فيه جرح واقف اغسل المواعين أو اعمل حاجه وحمايا قالي الكل فاكر اني امك موجوده معاكى عشان كده محدش طلعلك أنا لو حكمت اجبلك واحده بالفلوس تخدمك وانتي تنامي وترتاحي .

واتصل بابويا في التليفون وقاله شوف واحده تخدم بنتك وأنا هدفعلها حقها بس مينفعش واحده يبقى مفتوح بطنها وتقف تغسل المواعين طبعا أبويا وامي زعلوا وامي جتلي امبارح محدش رد عليها السلام لما سلمت عليهم وطبعا زعلانه وتقولي لحد السبوع وبيتك مش دخلاه تاني .

وعايزاني اني أفضل أشتم على أهل جوزي معاها ومدافعش عنهم وتقولي دول ناس متكبرين ومغرورين أنا بس عايزه اعرف مين اللي غلطان فيهم ومع العلم حماتي بتطلعلي وتعملي كل حاجه أمي مش بتعمل حاجه غير أنها بتسوي الأكل وخلاص وحمايا كل شويه يتصل يطمن عليا وابويا مااتصلش بيا غير مره واحده ولما حمايا كلمه عشان غسيل المواعين يقوله وايه المشكلة خليها تعتمد على نفسها لو سمحتوا الرد يبقى من غير غلط.

حل المشكلة 

بالفعل حماتك سيدة محترمة ومن الواضح انه حنونة عليكى واذا كانت امك اخطات بأنها لم تاتى من اول يوم فمش معنى ذلك انك تسمحى لنفسك بخصامها فهى فى النهاية امك والنصيحة ان تدخلى حد من أشقائها بأنك لاتقدرى على زعلها ولكن هى حطتك فى موقف محرج بعدم وقوفها معك وانتى وحاولى تقريبيهم مع حماتك وحماكى والتمسى ليها الاعذار وقولى ان كان فيه مشكلة عشان ميزعلوش من بعض.