جوزى مبيحبش يتصور ..تخيلوا لية !!

اتعودنا على مشاكل كتير الفترة اللى فاتت فى حال الناس ولكن المشكلة اللى هنعرضها زى ما وصلتنا غريبة شوية وهى ام زوجة بتشتكى ان زوجها مبيحبش التصوير تعالوا نشوف اية السبب .

زوج يكره التصوير لاسباب تعود لطفولتة

جوزى بيكره الصور جدا وانا حابه اتصور معاه كتييير ومبينزلش صوره على الفيس او اى وسائل تواصل اخرى رغم انه بسم الله ما شاء زى البدر فى تمامه وطول بعرض وشيك جدا ربنا يحفظهولى يارب وبيكره ينزل اى حاجة عن حياته الشخصية وفى مرة اتصورت معاه ونزلت الصورة ع الفيس صحى الصبح شاف الصورة قلب الدنيا وطلب منى امسحها ومنزلش اى صور شخصية لينا ولا لأولادنا مستقبلا ان شاء الله احنا لسه متجوزين بقالنا ثلاث شهور.

فسألت والدته عن سر كرهه للصور وهى ست طيبة بصراحة قالتلى وده مزعلك في اية  يابنتى ابنى من صغره وهو مبيحبش يظهر ولا يلفت النظر وبيحب جدا يساعد الناس من غير ما حد يعرف ولا يحس ومن هو عنده ٥ سنين لو شاف حد متسول فى الشارع مثلا يقعد يعيط ويرجع يقفل على نفسه الاوضة وينام.

السبب الحقيقى وراء الازمة

وكمان يفضل زعلان ومتضايق يومين تلاتة وحكتلى ان لما بقا فى اولى ثانوى طلب ينزل يشتغل فى الاجازة ووالده رفض فى البداية لاننا مش محتاجين وابننا مش بتاع بهدلة لكن مع اصراره الشديد شافله شغل خفيف عند واحد صاحبه بس لاحظنا ان مفيش حاجة بتتوفر معاه.

واحنا حسينا بده والده طبيعى كان بيسيب فلوس فى الدرج بتاع مكتبه لأنه مهما حصل مستحيل يجى طلب فلوس من ابوه او لبس او اى حاجه بس والده قال لازم نعرف هو بيودى الفلوس فين ولما سأل عرف انه بيوزعها على المحتاجين من غير ما حد يعرف ووالده فرح بيه جدا وبقى يسيبله فلوس اكتر وقالتلى انا حكتلك الكلام ده علشان اوصلك ان دى شخصيته ومتحاوليش تفتحى معاه موضوع الصور ده تانى علشان هيزهق منك اسمعى كلامه افضل وريحيه زى ما هو مريحك وشايلك فى عنيه.
بس بصراحة برضه انا مش مقتنعة وعايزة اغير وجهة نظره عن الصور تنصحونى بايه يا جماعة اغير فكرته دى زاى؟!.

حل ستو : ربنا يباركلك فيه ويحفظه ياريت ما تحاوليش نهائى انك تغير فكرتة الا بالتدريج وتحديدا عندما يكون فى حالة تسمح ولا تكررى هذا الشئ ان رفضة حتى لاتحدث مشكلة .