اهل جوزنى بيعاملونى على أنى خدامة

زى ماعودناكم فى حال الناس هنستقبل شكواكم والنهاردة مشكلة من احدى الصديقات القصة ببساطة ان زوجها مسافر برا وهى اللى بتخدم اهلة ودايما بيتلككوا لها وفى نفس الوقت ظهر خطيبها القديم فى الصورة تعالوا نشوف مشكلتها زى ما ارسلتها .

انا اتجوزت وجوزي سافر بعد شهر من جوازنا بقبت انزل عند حماتى واغسل المواعين والبوتاجاز واعمل ٣اصناف على الغدا وكنت اطلع من المطبخ الساعة 6المغرب علي شقتي وانزل الساعه 8واطلع الساعة 10وانزل الساعة 12اسهر لحد الساعة3الفجر واطلع شقتي وكنت ساعات بساعد مع بنتهم في ترويق الشقه المهم لقيت حمايا بيقول لبابا دا مراتي مريحة بنتك وبتغسل طبقين وتعمل الاكل وانا كنت مطحونه طول النهار في المطبخ المهم فقولت لاخت جوزي ادخلي انتي المطبخ وانا البيت لقيت نفسي انا اللى بعمل كل حاجة من غسيل مواعين والمطبخ و البلكونات واغسل الحمام وكل يوم اشيل الغسيل واطبقه وانشر غيره واروق الاوض وكل يومين امسح البيت وانفض واكنس السلم من الدور التالت لحد تحت واسيقه قولت مش مشكله طالما كويسين .

حمايا يعاملنى معاملة سيئة

وكان بيحصل مواقف منهم كنت بطنش وكبر دماغي ولو حكيت المواقف مش هخلص كلام المهم بعد انتظار سنة جوزي جه يقعد اسبوعين واول ماجه وبسلم عليه عيطت من فرحتي حمايا اصطادني لوحدي وقالي انتي بتموتي في الهم والنكد والغم ماردتش عليه وسكت وكانوا قايلين لما جوزك يجي ماتنزليش قولت الحمدلله تعبي في الشغل مارحش هدر وهيخلوني مع جوزي وبعد اسبوع من قعاد جوزي حمايا كان بيزعق لبنته عشان اتأخرت في الاكل وصاحيه العصر فاخوها زعل وقعد يزعق بعد ماشحنته وقعد يقول ماهي هتعمل ايه ماهي بتعمل كل حاجه لوحدها قولت لجوزي شوفت مع اني في اليوم دا عملت معاها الرز والسلطة ودقة السمك ويدوب هي نضفت السمك وقلته وانا نشرت غسيلهم وقولتله ماجتش علي الاسبوعين الا انت فيهم جوزي قالي كبري دماغك سكت وخلاص بعدها بكام يوم قاعدة انا وجوزي معاهم تحت وحماتي قاعدة وحمايا لقيت حمايا بيقول لجوزي بص يابني مراتك مابتعملش حاجه وبتتوكل علي بنتنا وماشوفناش منها طيب ومكشرة وقاعدة لو حدها في شقتها .

قعدت ادافع عن نفسي وبعدين يقول لجوزي دا انا لما باجي من برا بتطلع شقتها قولتله لما مش بيكون في حد في البيت بطلع شقتي عشان يخد راحته في بيته راح حمايا قالي ليه هو انا مش كويس قولتله مش قصدي انا اقصد تقعد براحتك في بيتك وانا متربيه علي الحياء وقعد يزعق فيا وقعدت اعيط وطلعت شقتي تاني يوم لقيت حماتي طالعالي بالغسيل بتاعي اللى  انا كنت نشراه تحت وهي اصلا عمرها ماطلعت غسيل وكنت بنشر كل فترة تحت وانزل اخد غسيلي واطلع المهم ماقالتليش خدي غسيلك ولا اتكلمت نص كلمة اخدت الغسيل واديرت حطيت الغسيل علي الارض وقفلت الباب نزلت عيطت وفضحتني في كل مكان اني هبشت الغسيل بغباء ورزعت باب الشقة علي اخري مع ان دا كدب وفهمت انها كانت طالعه تتسلطلي علي اي حاجه جوزي تاني يوم قالي انزلي اتأسفي لابويا قولتله بس انا ماعملتش حاجه عشان اتأسفله دا هو اللى افتري عليا بكلام ونزلت اتاسف راح رافع العكاز الا في ايده عليا ويشوح في وشي كأنه هيزقني بيه وبصوت عالي انتي انتهيتي بالنسبالي ماتلزمنيش وخودي شنطة هدومك لما جوزك يمشي وروحي عند ابوكي قعدت اعيط وقولت لجوزي سامع كلام بابك زعق فيا وقالي هو فين دا.

الاسف لاهل زوجى ومعاملتهم سيئة

اتصلت علي ابويا وطلعوا فيا كل حاجه وحشه ابوه وامه واخته واخوه واخو حماتي وانهم الطيبين الكويسين واني انا فيا العبر كلها والموضوع عدا بس جوايا نار بسبب ان جوزي مخدش حقى واهله قالو اني مش بشتغل مع انى شايله كل حاجه جوزي سافر وبعدين اخوه ضغط عليا اتأسف لامه قعدت اتحايل عليها وابوس دماغها وايديها واحضنها وابووسها من خدها عشان تسامحني وبالعافيه سامحتني.

وحمايا قعد يقولي صفي نيتك وخلي جواكي ابيض عشان ربنا يديكي يقصد الخلفه خلصت وطلعت شقتي وانهارت عياط بسبب كسرتي وذلي في الاعتذار وانا ماعملتش حاجه وبيعايرني بالخلفه المهم بدات اكلم جوزي في التليفون واتحايل عليه يقولي كلمه حلوه يراضيني عشان اقدر انزل اشتغل وانا متراضيه بقيت اقوله عايزه احس اني انثي قولي اني كويسة ولو كدب اي كلام يواسيني ومفيش فايدة بقيت حاسه اني ميته مش عايشه غير للخدمه لاهله ومتجوزني ورميني لاهله انا كنت مخطوبة وانا عندي 17سنه لابن عمتي وكان بيحبني وانا عندي 7سنين وفضلت جواه لحد ماكبر وسافر يكون نفسه واتقدملي وخطبني بس بابا خاف من اخته تعمل عليا حما وان جواز القرايب بيجيب مشاكل وفسخ الخطوبةفضل ابن عمتي 8سنين من غير جواز ومش عارف يعيش واتمرمط واستقال من شغله علي اساس نازل يتجوزني ومستقبله باظ وفضل عاوز يوصلي لانه بيموت فيا .

خطأ فادح تتصل بخطيبها السابق

وفعلا وصلي من كام يوم واتكلم معايا بتاع 3او 4 مرات وبعدين حسيت بالذنب وقولت انا كده بخون جوزي وبعصي ربنا وبعدت عنه خالص وقولت خليني في عيشتي ودا قدري بكلم جوزي اتسلط في كلمتين كده واتخانقنا قولتله رايحه اقعد عند ماما اسبوع وروحت بالخناق وبعدين كلمني بيغلطني وبيعاتبني واني مش بشوف نفسي غلطانة اتخنقت وقولتله انت عمرك ما شكرت فيا ولو كدب كفاية بقي انت تزعل وانا اراضيك وازبل معامله وانا ادادي انا خلاص عندي ثقه في نفسي وانا مش وحشه وكمان انا حلوه ومش هستني كلمه منك تحسسني اني حلوه وقولتله الا يشيلني فوق راسه اشيله في عيني والا يهيني ويركب فوقيا هدوس عليه بجزمتي كفايه بقي اهلك والا بيعملوه فيا وانت والا بتعمله فيا قولتله طب اعيش عشان مين جوزي واهله بيعاملوني وحش طب مين يهون عليا ويقولي كلمة كويسه راح قافل معايا بزعل وماكلمنيش من يوم السبت وانا مش عايزه ارن عليه وبقول كفايه بقالي سنه بدادي فيه واراضيه كفايه ذل ليه ولاهله ايه رايكم.

حل ستو :اولا اخطاتى عندما تركتى الامور تصل لهذا الحد فحلك ان تدخلى اهلك لكى تنعزلى فى شقتك وترعى بيتك او تكونى فى بيت اهلك طول فترة سفر زوجك وتصرى هلى ذلك اما الخطأ الكبير فهو حديثك مع خطيبك السابق فهذا خطا جسيم يجب ان تبعدى عنه فورا احتراما لنفسك ولزوجك.