انا حامل وجوزى عايزنى أخدم حماتى

حال الناس بيرصد دايما مشاكلكم وانتوا اللى بتحرروه بايديكم والنهاردة معانا مشكلة من احدى الصديقا لصفحة اسمع كلام ستك ليها مشاكل مع أسرة زوجها وتحديدا حماتها وهى حامل تعالوا نشوف مشكلتها .

جوزى بيقولى روحى لبيت أبوكى بسبب حماتى

انا حامل وجوزى عايزنى انزل اخدم امه فى نفس المنزل ولكنها فى الدور اللى تحت وانا معايا سلفه “زوجة أخو زوجى ” واحنا الاتنين كنا معزولين بس جوزى رجع قال انتى بس اللى هتنزلى تحت وسلفتك معزوله والعدل انى مينفعش أنزل لوحدى لازم هى اسبوع وانا اسبوع عدل ربنا المهم النهاردة بقول والله ما هنزل غير لما هى كمان تنزل اسبوع زى وانا حامل وتعبانه جوزى مش راضى بيقول لو  منزلتيش  تروحى على بيت ابوكى رأيكم ايه وانا بصراحة عايزه امشى عشان انا زهقت اقسم بالله كفايه تعب الحمل.

حل المشكلة مع ستو 

حل ستو فى البداية انتى لم توضحى طبيعة علاقتك بحماتك اذا كانت جيدة أم لا ثم ما طبيعة أرتباط قراراتك بقرارات سلفتك فمن المفترض أن كل واحد له قراراتة الثابتة ثم مش معنى ان زوجك يقولك تنزلى كان ممكن تراضية وتنزلى وبعد كدا تقوليله ان الحمل تعبك ومش قادرة على الشغل بطريقة كويسة ساعتها كان سيصبح المدافع عنك فى ذلك فليس حلا ان تذهبى لبيت والدك فى مثل هذة الظروف حيث سيتسبب ذلك فى تصعيد المشكلة بطريقة اخرى ويجب ان يكون لك التفكير فالافضل ان تنزلى وبعدها بطريقة لطيفة تختارى الوقت المناسب لذلك وتقولى له أنك متعبة ولاتربطى كلامك بموقف سلفتك حيث ان وقتها سيعند فى الحل لأنه سيكون فى رأسة أنك اخذتى هذا الموقف بسبب سلفتك وليس لأنك متعبة وكان من الاولى أن تفهمية أنك تحافظين على طفلة وأنك قدر الأمكان ستنزلى لها لأنه بالتأكيد يحاول أرضاء والدتة فمن ليس له خير فى امة ليس له خير فى أحد .

وفى النهاية لابد ان تتسمى بالهدوء فى هذة الفترة خاصة وأنك حامل والعصبية غير مطلوبة نهائيا فى تلك الفترة كما يجب ان تتسمى بالعقلانية فى التصرفات فلاتتصيدى مجرد كلمة له حتى تقومى بالذهاب لمنزل والدك فهذا ليس حلا.