جوزى ضربنى طردنى من البيت وخد بنتى منى

المشكلة اللى جاتلنا فى حال الناس من أحدى صديقات صفحة أسمع كلام ستك وهى باختصار زوجة اتخانقت مع زوجها وحلف عليها تروح بيت أهلها ومتخدش بنتها وحماها وحماتها موقفوش معاها وقالوها سيبى البنت واضطر لفطمها رغم أنها مكملتش سنة ولدرجة أنها رجعت بعد أسبوع لما محدش حل المشكلة تعالوا نشوف مشكلتها مع ستو زى ما بعتتها فى البداية أنا وجوزي اتخانقنا وقالي يلا امشي متقعديش في البيت

أهل زوجى تركونى ولم يتدخل أحد لحل المشكلة 

وجيت ماشية وباخد بنتي معايا مرضيش وقالي مش هتاخديها وحلف عليا بالطلاق اني امشي من غير بنتي انا فضلت اتخانق معاه علشان يديهالي وامشي بس هو فضل يحلف بالطلاق اني امشي ومخودش بنتي وهي كان عندها ١١ شهر يعني مكملتش سنة وكانت لسة بترضع المهم نزلت وقولت لحمايا وحماتي اني ماشية وهما كانوا سامعين وشايفين اللي حصل بس معملوش حاجة لانه ابنهم ومرضيوش هما كمان يخلوا جوزي يديني بنتي وسابوني امشي.

وخادو مني بنتي ولما قلتلهم بنتي بترضع مش هينفع اسيبها قالولي لا احنا هناكلها ونعملها كل حاجة وخادوها مني ومشيت علي بيت اهلي وانا بعيط وحاسة اني هتشل وحكيت لاهلي اللي حصل وكنت بصبر نفسي واقول يمكن حماتي تطلع كويسة وتبعتلي بنتي بس للاسف محصلش وفضلت قاعدة اسبوع عند اهلي مليش نفس للاكل وكل ما امي وابويا يقولولي كلي اعيط واخواتي يعيطوا عليا وعلي بنتي حتي امي مكانتش بترضي تاكل لما تشوفني بعيط ولا زعلانة المهم قعدت اسبوع من غيرها وبعدين قولت لاهلي انا هرجع بيتي انا عايزة بنتي وفعلا رجعت بيتي بس ساعتها كانت بنتي خلاص اتفطمت بس انا من ساعتها وانا حاسة بالذنب وحاسة اني السبب في فطامها بدري.

حاسة أنى شايلة ذنب فطام بينتى 

وكل ما بفتكر اللي حصل بزعل عليها الناس اللي بتقول كنتي قعدتي ومسبتيش بنتك انا جوزي بهدلني وضربني فوق في شقتي وضربني تاني قدام حمايا وحماتي ومحدش عمل حاجة ولما قولت اني هحكي اللي حصل لاهلي وأنهم بهدلوني قالتلي وانا هروح اقول انك كنتي طالعة البلكونة بقميص النوم وقدام حمايا وحمايا راجل كبير ومتكلمش انا فضلت اتحايل عليهم يدوني بنتي بس هما بهدلوني في اكتر من انها تقولي انا هقول انك كنتي طالعة البلكونة بقميص النوم.

الناس اللي بتقول كنتي طلعتي القسم وكانوا يجيبولك بنتك دول للاسف  قرايبنا يعني مينفعش نعمل لبعض محاضر وانا أبويا ربنا يعافيه مريض يعني شوية زعل ممكن لا قدر الله ميبقاش معانا وانا محدش من اهلي وقف جمبي اهلي كله عرف اللي حصل وسكت كانوا بس بيقولولي معلش أقسم بالله انا كنت هتطلق من اول ما حلف عليا بس كلهم قالوا حرام علشان خاطر بنتك .

وهي شوية وهيجيبوهالك انا روحت بيتي بعد اسبوع لما كنت هموت علشان بنتي ورجعت بس علشان خاطر بنتي ولما رجعت لقيت بنتي مع جوزي في الشقة هو اللي بيجيبلها لبن وبيشربها وبيلاعبها وينيمها ويغير لها هدومها البامبرز كمان وامه مكانتش بتعملها اي حاجة زي ما يكون مش بنت ابنها وناس جيرانا قالولي ان جوزي كان بيفضل شايل البنت علي طول وانهم كانوا بيشوفوا ماشي بيها الفجر في الشارع وهي بتعيط.

قعدت فى بيت أهلى أسبوع ورجعت وجوزى صالحنى

يعني حماتي وحمايا واخوات جوزي محدش فيهم خد باله من بنتي وأبوها اللي كان بيهتم بيها في الاسبوع دة وبعد ما روحت جوزي فرح وفضل يبوس علي راسي ويقولي حقك عليا بس انا مرضتش اني اكلمه وقولتله انا رجعت علشان خاطر بنتي وانا هخدمك كانك جوزي وبس يعني متكلمنيش فضل يقول معلش ويبوس راسي علشان اسامحه انا جوزي كان عايز يرجعني يوم ما اتخانقنا بس اهله قالوله لا سيبها متروحلهاش وحلفوا عليه انهم مش هيكلموا لو رجعني فهو مرضيش يزعل امه وابوه وييجي عليهم فجه عليا انا وبنتي علي العموم في الاخر مش هقول غير الحمد لله علي اللي يجيبه ربنا واهو جوزي يمكن يكون عرف قيمتي لما اهله سابوه هو اللي ياخد باله من بنته.

حل ستو فى النهاية ليكى بيتك وجوزك وبنتك وعشان كداحافظى على ده وهو حس بخطائة وعشان كدا صالحك ون الواضح أن محدش وقف معاكى من أهلة ولا اهلك فحافظى على أسرتك وقصة الفطام مشذنبك وهو حلف عليكى .